Bei Wind unn Wedder sidd ma ne als draus

rumlaafe um Friedhof,

mi’m Räänschirm in all Faawe.

Unn aach sunschd is sei Läwe

aller Couleur.

Sei Devise: Alles Doode soll ma hinner sich lasse.

Selbschd um Grabstään is nix firr ewisch

in Stään gemeiseld,

vawannnele wird sich eh immer alles.

Im Grund passt’a

unner kän Helm unn in kän Huddschachdel.

Er wird nit schieße, nähm kän Knarr in die Hand

unn dass heidsedaachs!

Obwohl,

wenn’sem mòòl se bund wird,

knurrt a rumm wie e Schieshund.

Er glaabt nimmeh draan,

irjend e Zuuch im Läwe se vapasse.

Wenn im Gaade mòòl e Voochel peifd,

bräschd fier ne es Paradies aus.

Neilisch machd’a es roschdische Friedhofsdoor uff

unn mend es Kreiz

wer mee als nur zwei Balge.

Komischer Kautz,

wenns drieb is, guggt’a in de Himmel,

saad grau wär nit wirglisch grau,

weil dòò doch all Faawe drinn wäre.

Wem’ ma ne braucht, springt’a bei unn

maschierd dann doch irjendwie mit,

de Paradiesvoochel.

Er lasst

känner

im Rään stehn,

mit seim bunde Schirm.