Zahnligge hat de Jupp.

Unn fròò nit wie.

Wenn’a durch die ähn durchpeifd,

herd sisch’s bisje aan,

wie wenn e Zuuch vun weithär aangepiff kummd,

wenn’s so lauter unn widder leiser wird.

Wie’a das bloß hinkritt, de Jupp ?

Bevor ra dòòdemit losleed

unn hinnerhär, wenn’a ferdisch is,

lachd’a immer laut.

In da ledschd Zeit is’a so sonderbaa, de Jupp.

Es gäb nur noch Au um Au

unn Zahn um Zahn uff da Welt.

All wäre se nur noch blendend unn weiß.

All wirde s’em rundrum immer nur die Zähn zeije.

Unn das wird’em rischdisch weh duun.

Irgendwann, wenn’s ganz schlimm wird mi’m,

schnappt’a sich wie am Sääl uffgezòò,

sei ald Bleschdoos vum Schrank,

grit so rischdisch

sei Rappel.

Ruff unn runner,

riwwer unn niwwer,

schiddeld ’a das alde vadebberte Ding.

Er dräht sich dezu wie e Danzknopp.

Kreiz unn quär geht’s durch sei Kisch

Das machd ach e Höllelärm.

Kä Wunner !

Innewensisch sinn

ròschdische Muddere unn Schrauwe drinn,

dezwische Kirschkääre,

Ma saad, sogaa noch Egg - Milch unn Schneidezähn

aus’ em Kinnergaadealder

solle dòò noch mit drinn rumklabbre.

Genuch Ligge had’a jòò in da Schniss.

Nòò ra Weil gebbt’a dann widder Ruh.

Es leet sich langsam.

Er tappt noch ämòòl mi’m linke Fuß uff,

stellt die Biggs serigg

uff de Schrank,

unn is widder um rischdische Gleis.

Wie e Gebät kummt dann der Satz:

„Au um Au, Zahn um Zahn hat jetzt widder Ruh.“

Ganz feierlisch guggt’a dòòdezu,

wie e Paschdoor.

Wo’a die Marott bloos här hat?

Wenn isch hemm gehn,

lacht’a mit seine kaum noch Zähn in da Schniss,

unn werfd’a ma

noch e Petz’au zu,

de Jubb.

Durch die Dier her isch noch,

wie’a lacht unn peifd

unn sei Zuuch widder kummd

Vun ganz weithär.

Unschlaachbaar

der Kerl.