De Babba werfd’s hoch in de Himmel unn

’s Herzje vum Klään bobbert wie wild.

„Engelsche, Engelsche flie“, ruft de Babba

unn fangt’s widder uff,

mit seine zwei staage Arme.

Immer unn immer widder werft a’s hoch,

’s lacht sisch ball kabutt.

Bis nòò Amerika will’s flieje,

zu de Niagarafäll,

wo’s rauscht unn braust in de Ohre.

’s waa noch nie dort,

kennt nur denne Kuvert,

denne ma firr die Luftposcht brauch.

Mit blau weis roode Balge runderum.

Der kummt mit denne ville annere Kuverts

in e Sagg unn dann mi’m Fluuchzeisch

iwwers weide Meer,

zu de Niagarafäll,

die druffgemòòlt ware

uff’da Briefmaak vum Lufdposchdkuvert.

Unn’s fròòt,

was die Briefmaak unn iwwerhaubt Amerika koscht ?

„Engelscher brauche känn Geld zum Flieje“, mend dòò de Babba

werfd’s hoch in die Luft un fangt’s dabber widder uff,

mit seine staage Arme!